Մաշկի մաքրում․ ի՞նչ միջամտություն է սա

Մաշկը մշտապես ենթարկվում է արտաքին գործոնների ազդեցությանը՝ մասնավորապես ավելորդ մաշկային ճարպը, մահացած բջիջները, շրջակա միջավայրի փոշին, աղտոտվածությունը և կոսմետիկ միջոցների մնացորդները խցանում են ծակոտիները՝ հանգեցնելով մաշկի անառողջ գույնին, տեսքին և առաձգականության կորստին։

Մաշկի մաքրումը կոսմետոլոգիական միջամտություն է, որի նպատակը մաշկի մաքրումն է վերոնշյալ կուտակումներից։ Այս միջամտությունն ունի մի շարք կարևոր գործառույթներ, որոնց պատճառով անընդմեջ միջամտության կատարումը դիտվում է որպես անհրաժեշտություն։

Թերևս ամենակարևոր առավելությունը մաշկի ամենօրյա խնամքի ազդեցության լավացումն է, մաշկի պարբերական մաքրումից հետո ամենօրյա խնամքի միջոցներում առկա ակտիվ նյութերն էլ ավելի արագ և խորն են ներթափանցում մաշկի համապատասխան շերտեր՝ ամբողջությամբ կատարելով իրենց սահմանված գործառույթները։

Կոսմետոլոգիական առումով մաշկի մաքրումը համարվում է մաշկը նախապատրաստող միջամտություն՝ այլ կոսմետոլոգիական միջամտություններից առաջ, ինչպիսիք են՝ տարատեսակ սարքավորումային և ներարկումային միջամտությունները։

Ու՞մ է պետք մաշկի մաքրումը

Մաշկի մաքրումն անհրաժեշտ և ցուցված է բոլորին, սակայն մաքրման մեթոդի ընտրությունը պետք է կատարվի՝ ըստ մաշկի տիպի և այլ հանգամանքների մանրամասն դիտարկման։

Մաշկի մաքրումը կատարվում է տարբեր մեթոդներով՝ մեխանիկական և ատրավմատիկ, դրանք իրենց հերթին ունեն նաև տարատեսակներ։ Բժիշկը, զննելով մաշկը ու հիմնվելով բոլոր ցուցումների և հակացուցումների վրա, առաջարկում է տվյալ անձի համար մաշկի մաքրման ամենաարդյունավետ և ամենահամապատասխան տարբերակը։