Քիմիական պիլինգներն ուղղված են նպաստելու մաշկային (էսթետիկ) այս կամ այն խնդրի լուծմանը։ Գոյություն ունեն տարբեր քիմիական պիլինգներ, տարբեր ազդող նյութերով, որոնց ընտրությունը կայացվում է մաշկի յուղոտ կամ չոր լինելու՝ այնուհետև այլ առանձնահատկություններով պայմանավորված։

Առաջարկում ենք ծանոթանալ քիմիական պիլինգների տեսակներին, դրանց կիրառման կարգին, հակացուցումներին և ցուցումներին՝ հատկապես խնդրահարույց մաշկի բուժման գործում։ 

Բժշկական քիմիական պիլինգը հատուկ բժշկական բաղադրությունների (քիմիական նյութեր) օգնությամբ կատարվող կոսմետիկ միջամտություն է, որն ապահովում է վերնամաշկի շերտազատումը:

Քիմիական պիլինգի տեսակները

Գոյություն ունեն մի քանի տեսակի քիմիական պիլինգներ, որոնք տարբերվում են բժշկական լուծույթի բաղադրությամբ և ներթափանցման խորությամբ: Պիլինգի համար նախատեսված նյութերի գլխավոր քիմիական բաղադրիչը թթուն է: Բժշկական լուծույթը կարող է պարունակել մեկ տեսակի թթու, այդպիսի պիլինգը կոչվում է մոնոթթու պիլինգ, կամ երկու և ավելի տարբեր թթուներ՝ բազմաթթու պիլինգ:

Ըստ ներթափանցման խորության՝ գոյություն ունի պիլինգի երեք տեսակ․

• մակերեսային — բժշկական նյութերի ակտիվ բաղադրիչները ազդում են եղջերաթաղանթի և մաշկի հատիկավոր բջիջների շերտերի վրա
• միջին — ակտիվ բաղադրիչների ազդեցությանն են ենթարկվում էպիդերմային շերտը՝ մինչ պապիլյար դերմիսի շերտ
• խորը — ակտիվ բաղադրիչների ազդեցությանն են ենթարկվում մաշկի բոլոր շերտերը՝ մինչ բազալ շերտ:

Պիլինգի խորության վրա ազդում է ոչ միայն թթվի ընտրությունը, այլ նաև լուծույթի մեջ նրա կոնցենտրացիան, մաշկի վրա կիրառվող շերտերի քանակը, ազդեցության ժամանակը, բաղադրությունն ու pH արտադրանքը։

Կոնցենտրացիան որոշվում է տոկոսներով (1% -ից 70%), և ցույց է տալիս լուծույթում առկա ակտիվ նյութերի քանակական պարունակությունը:

Նյութը կարող է լինել գելային հիմքով կամ ջրասպիրտային լուծույթի տեսքով: Գելային հիմքով նյութերի՝ մաշկի շերտերում ներթափանցման խորությունը կախված է ազդեցության ժամանակից: Ջրասպիրտային հիմքով լուծույթները կիրառվում են շերտերով։ Որքան շատ լինեն շերտերը, այնքան խորն է պիլինգը: Յուրաքանչյուր հաջորդ շերտը քսելուց առաջ նախորդը պիտի ամբողջովին չորանա:

pH-ը թթվայնության ցուցիչն է և ամենակարևորներից մեկն է քիմիական նյութի ագրեսիվությունը որոշելու համար: Օրինակ՝ 80% թթու պարունակող և 4,5 pH ունեցող ցանկացած լուծույթ շատ ավելի թույլ կլինի, քան ընդամենը 10% նույն թթուն պարունակող, սակայն 1,3 pH-ով լուծույթը։

Օգտագործվող թթվի անունով բժշկական պիլինգները կարող են լինել.

• գլիկոլային պիլինգ
• նշի պիլինգ
• սալիցիլային պիլինգ
• կաթնային պիլինգ
• մրգային պիլինգ
• պիկրինաթթովով պիլինգ
• տրիքլորաքացախաթթվի պիլինգ

Ցուցումներ բժշկական քիմիական պիլինգի համար

Բժշկական քիմիական պիլինգը կարող է լուծել կոսմետիկ խնդիրների մեծ մասը, դրա շնորհիվ հնարավոր է նորմալիզացնել կերատինոգենեզի, բնական ապոպտոզի և երիտասարդ բջիջների բաժանման գործընթացները: Բժշկական քիմիական պիլինգն ունի հակաբորբոքային և հակապիգմենտային ազդեցություն: Տարբեր խնդիրներ կարելի է բուժել` կախված քիմիական նյութի ներթափանցման խորությունից: