Ֆիլերները հիալուրոնաթթվի հիմքով գելանման նյութեր են, որոնք կիրառվում են ներարկումային մեթոդով՝ խորը կնճիռների, գրավիտացիոն պտոզի (հյուսվածքների իջեցում), դեմքի և մարմնի այս կամ այն հատվածին ծավալ հաղորդելու և ասիմետրիաների շտկման համար։

Ֆիլերները ներարկվում են շատ նուրբ ասեղի կամ կանուլյայի միջոցով: Միջամտությունից առաջ կատարվում է ապլիկացիոն (քսուքային) ցավազրկում, սակայն, որոշ դեպքերում ցավազրկման այս տարբերակը նույնիսկ չի օգտագործվում։ 

Միջամտության ընթացքը կարճ է՝ տևում է մոտ կես ժամ, իսհարկե կախված է նաև, թե կոնկրետ ինչ նպատակով է կատարվում միջամտությունը և որ հատվածում։

Ուրվագծային պլաստիկայի համար հատուկ նախապատրաստություն չի պահանջվում, բավական է միջամտությունից երեք օր առաջ չօգտագործել ալկոհոլ, ասպիրին և դրա հիմքով  դեղամիջոցներ, չայցելել սոլյարի և չընդունել արևայրուք:

Հիալուրոնաթթուն, որի հիման վրա են ստեղծվում ֆիլերները, մարդու միջբջջային մատրիցայի, այդ թվում՝ մաշկի բնական բաղադրիչն է: Հիալուրոնաթթուն կարևոր դեր է խաղում հյուսվածքների վերականգնման, կոլագենի ու էլաստինի սպիտակուցների ճիշտ շղթաների սինթեզման գործընթացում: Այն նաև ձեռք է բերում և պահում մեծ թվով ջրի մոլեկուլներ: Ֆիլերների ներարկումներն ապահովում են երիտասարդացնող ազդեցություն՝ խնդրահարույց հատվածը ինտենսիվ խոնավացնելով և խթանելով կոլագենի ու էլաստինի սինթեզը:

Ուրվագծային պլաստիկայի ցուցումները․

Ուրվագծային պլաստիկա կիրառվում է հետևյալ դեպքերում՝՝

•Դեմքի մանր չափավոր և խորը կնճիռների շտկման դեպքում (արցունքային ակոսների, քիթ-շրթունքային ծալքի, միջհոնքային կնճիռների, հարակնային շրջանի);

•Հյուսվածքների ծավալի վերականգնման դեպքում (ֆիլերների ներարկումները վերականգնում են կորցրած ծավալը դեմքի վերին, միջին և ստորին հատվածներում ` քունքեր, այտոսկրեր և կզակ);

•Դեմքի օվալի շտկման դեպքում;

•Շրթունքների ձևի և ծավալի հաղորդման դեպքում;

•Քթի ձևի և ականջի բլթակների փոփոխությունների դեպքում;

•Ձեռքերի երիտասարդացման դեպքում։

Ժամանակակից կոսմետոլոգիայում ֆիլերների միջոցով կատարվող ուրվագծային պլաստիկան ամենապահանջված միջամտություններից մեկն է: Այս նյութերը արդյունավետ են և ոչ միայն դեմքի երիտասարդացման, կնճիռներից ազատվելու համար: ֆիլերները, որոնք ներարկվում են շրթունքների մեջ, թույլ են տալիս շտկել դրանց ձևը, դարձնել ավելի ծավալուն և խոնավացնել:

Ուրվագծային պլաստիկայի առավելությունները՝

•երիտասարդացնող ազդեցությունը նկատելի է միջամտությունից անմիջապես հետո;

•տարբեր տեսակի կնճիռները շտկելու արագ, անցավ և անվտանգ մեթոդ է;

•բարդությունների իրական բացակայությունն է ապահովում;

•քիչ քանակությամբ հակացուցումներ կան;

•վերականգնման շատ կարճ ժամանակահատված է անհրաժեշտ;

•ապահովվում է երկարատև արդյունք;

•ունի պարզ նախապատրաստական շրջան;

•մեթոդը չի խախտում և չի փոխում դեմքի միմիկան;

•ֆիլերները ունեն բնական հիմք մաշկի կառուցվածքի համար:

Ուրվագծային պլաստիկայի միակ թերությունն այն է, որ ժամանակի ընթացքում՝ կորեկցիայից վեց ամիս կամ մեկ տարի անց, ֆիլերը, բնականաբար, կենսաքայքայվում է, և պահանջվում է միջամտությունը կրկնել:

Միջամտության արդյունքները՝

•Միջամտության տևողությունը` 30-60 րոպե:

•Ազդեցության տևողությունը՝ 8-18 ամիս (կախված է նյութի խտությունից, միջամտության պարբերաբար կատարումից, պացիենտի անհատական առանձնահատկություններից և ապրելակերպից):

•Վերականգնման շրջանը՝ 2-ից 7 օր (հեմատոմայի առաջացման վտանգ կա, միջամտության կատարման առաջին օրերին հնարավոր է նկատվի այտուցվածություն):