Պսորիազը քրոնիկ մաշկախտ է, որին բնորոշ է իմունոմիջնորդված ախտածագում և անկանխատեսելի՝ հաճախ քրոնիկ ընթացք: Հիվանդության արտահայտվածությունը կախված է ժառանգական նախատրամադրվածությունից, ներքին և արտաքին այլ գործոններից։
Սպասելով ապագայում գենետիկ միջամտություների հնարավորությանը՝ այսօր բուժումը հիմնված է միայն ախտանշային և պաթոգենետիկ թերապիայի վրա, որն ուղղված է ախտահարված մաշկը ժամանակավորապես բարելավելուն և հիվանդությունը տանելի դարձնելուն: Մինչ այժմ գոյություն ունեն դեղերի և բուժման ձևերի մի քանի շատ թե քիչ արդյունավետ տեսակներ, որոնց յուրաքանչյուր պացիենտ տարբեր ձևով է արձագանքում:
Որոշ թերապիաների տեսակներ շատ արդյունավետ են մի խումբ բուժառուների համար, մինչդեռ մյուսների դեպքում միայն աննշան չափով են բարելավում վիճակը: Այդ իսկ պատճառով շատ կարևոր է անհատական մոտեցումը՝ հիմնված հիվանդության պատմության և արդեն իրականացված բուժումների արդյունավետության վրա
Կարևոր է հիշել՝ թերապիան պետք է հիվանդությունից վտանգավոր կամ անախորժ չլինի: Ամենալավ բուժումն այն է, որն ապահովում է լավագույն արդյունք և արդյունավետություն/կողմնակի հետևանքներ խելամիտ հարաբերություն: Իհարկե, կողմնակի հետևանքների և արդյունավետության միջև հարաբերությունը պետք է վերջինիս օգտին լինի:
Բուժման հիմնական մոտեցումներն են տեղային, ֆոտոթերապիայի և համակարգային մեթոդները։
• Տեղային բուժումն իրականացվում է տեղային կորտիկոստերոիդների, կերատոլիտիկների և այլն դեղամիջոցների միջոցով։
• Ֆոտոթերպաիան իրականցվում է A և B ուլտրամանուշակագույն ընդգրկույթի միջոցով։
• Համակարգային բուժումն իրականացվում է տարբեր խմբերի պատկանող իմունաճնշիչ դեղամիջոցների օգնությամբ։
![](https://cosmolab.am/wp-content/uploads/2020/01/IMG_5987-1024x682.jpg)
Ուլտրամանուշակագույն ճառագայթման միջոցով պսորիազի և որոշ այլ մաշկախտերի բուժումը վաղուց ընդգրկված է ապացուցողական բժշկության վրա հիմնված կանոնակարգերում և լայնորեն կիրառվում է արտերկրում։
Պսորիազի բուժման մեջ կիրառվող ֆոտոթերապիայի մեթոդներն են՝
PUVA , NB UVB (311-312նմ) և թիրախային ֆոտոթերապիայի մեթոդները (MEL308նմ)
PUVA-ն ֆոտոքիմիաթերպիա է, որն իր մեջ ներառում է պսորալենի և UVA՝ ուլտրամանուշակագուն A ընդգրկույթի ալիքներ։ Ոչ վաղ անցյալում համարվում էր ֆոտոթերապիայի ոսկե ստանդարտ, բայց ունենալով շատ կողմնակի ազդեցություններ՝ այդ թվում մաշկի քաղցկեղը, իր տեղը զիջել է NB-UVB և թիրախային ֆոտոթերապիաներին։
Այսպիսով, խորհուրդ տրվող ֆոտոթերապևտիկ մեթոդներն են NB UVB (311-312նմ) և թիրախային ֆոտոթերապիան (MEL308նմ)։
Թիրախային ֆոտոթերապիան, որն իրականացվում է մոնոքրոմատիկ էքսիմերային լազերի կամ լույսի միջոցով, տարբերվում է NB-UVB ֆոտոթերապիայից էլ ավելի ուղղորդվածությամբ (թիրախավորվածությամբ), որը հնարավորություն է տալիս ապահովել ավելի բարձր արդյունավետություն։ Կոչվում է թիրախավորված, քանի որ հնարավորություն է տալիս ազդել բացառապես ախտահարված մաշկի վրա՝ շրջանցելով շրջակա առողջ հյուսվածքները։
«Cosmolab»-ը առաջարկում է իտալական արտադրության Excilite- µ սարքավորմամբ 308 նմ էքսիմերային լույսով թիրախային ֆոտոթերպիա։
![](https://cosmolab.am/wp-content/uploads/2020/01/IMG_5985-1024x670.jpg)