Ինչպե՞ս բուժել ակնեն և ո՞ր միջոցն է առավել արդյունավետ այս հիվանդության դեմ:

Շատերն իրենց փորձից գիտեն, թե որքան բարդ է գտնել ակնեի դեմ արդյունավետ միջոց: Հաճախ կորեակային ցանն ի հայտ է գալիս դեռահասության տարիքում և հիվանդությունն իր մասին կարող է հիշեցնել ամբողջ կյանքի ընթացքում: Սակայն ո՞ր միջամտություններն են առավել արդյունավետ: Հարթ, մաքուր և առողջ մաշկը գեղեցկության չափանիշներից մեկն է: Որոշ մարդկանց լավ մաշկ է տրված բնությունից, սակայն մեզանից շատերը գոնե մեկ անգամ հանդիպել են այն երևույթին, որ գովազդում քաղաքավարի անվանում են «թերություններ»: Բոլորը գիտեն, թե ինչպես կարող է ինքնագնահատականի վրա ազդել մեկ փոքր բշտիկն անգամ: Իսկ եթե այս բորբոքումները տասնյակն են և չեն ցանկանում անհետանա՞լ:

Կորեակային ցանը, կամ ակնեն ճարպագեղձերի բորբոքումն է: Ճարպագեղձերը մեր մաշկին անհրաժեշտ են, դրանց գործունեության շնորհիվ այն մշտապես մնում է խոնավեցված: Սակայն երբեմն այդ համակարգը խաթարվում է: Ճարպագեղձերի ծորանները փակվում են մահացած բջիջներով, գեղձը բորբոքվում է և առաջանում է կոմեդոն կամ ցավոտ բշտիկ: Ակնեն տարածված խնդիր է: Այս կամ այն ձևով կորեակային ցանը հանդիպում է 12-ից 14 տարեկան երիտասարդների 60-80% մոտ: Սակայն կորեակներ կարող են առաջանալ նաև հասուն տարիքում:

Ինչպե՞ս ձերբազատվել ակնեից

Հաճախ ակնեի առաջացման պատճառ է դառնում հորմոնալ ֆոնի փոփոխությունը: Այդ պատճառով բշտիկները սեռահասունացման բնականոն հայտանիշներից են: Սակայն կորեակային ցանի առաջացման համար պատասխանատու են ոչ միայն հորմոնները: Ցանի առաջացման կարող են հանգեցնել սթրեսը, անկայուն սննդակարգը, որոշակի դեղորայքի ընդունումը: Այս գործոններն ինքնին կորեակներ չեն առաջացնում, բայց կարող են դառնալ գլխավոր խթանը, եթե դուք ակնեի հակվածություն ունեք: Ակնե բուժելն այնքան էլ բարդ չէ, չնայած բավականին շատ ժամանակ է պահանջում:

Ակնեի բուժումը

Առավել հաճախ ակնե առաջանում է դեմքի, կրծքավանդակի և մեջքի հատվածներում՝ այնտեղ, որտեղ ճարպագեղձերը շատ են, իսկ ծակոտիները՝ առավել լայն: Կորեակային ցանը հիվանդություն է, որը պետք է բուժի մասնագետը: Ակնեի բուժման մեթոդը կախված է հիվանդության ծանրությունից: Կոսմետոլոգները տարանջատում են ակնեի երեք ձև.

• թեթև՝ ոչ ավելի, քան տասը փակ կամ բաց կորեակներ՝ առանց բորբոքման նշանների;

• միջին՝ 10-ից 40 կորեակային տարր՝ բորբոքման աննշան հայտանիշներով;

• ծանր. 40-ից ավեի կորեակային տարր:

Ակնեի թեթև ձևը հեշտությամբ ենթարկվում է բուժման տեղային միջոցների օգնությամբ՝ գելեր, հատուկ քսուքներ: Միջին կամ ծանր ձևի դեպքում տեղային թերապիայի միջոցները զուգակցում են համակարգային (ներքին օգտագործման դեղորայք) բուժման ձևի հետ։

Ակնեի բուժումը հաճախ համակցվում է նաև սարքավորումային բուժման հետ, ավելին՝ կարդացեք այստեղ։

Պետք է հիշել, երբ բուժումը տալիս է իր արդյունքը և ակնեն «անհետանում» է, դա դեռ չի նշանակում, որ պետք է դադարեցնել մաշկի խնամքը, հակառակը՝ հատկապես ակնեի հակումով մաշկը ամենօրյա պարտադիր խնամք է պահանջում, ինչպես նաև պրոֆիլակտիկ այցեր մաշկաբանին՝ մաշկի վիճակի գնահատման և հնարավոր բարդացումների կանխարգելման համար։